Vəkillər Kollegiyası Rəyasət Heyətinin növbəti iclasında “Vəkillərin peşə hüquqlarının müdafiəsi komitəsi”nin Əsasnaməsinin layihəsi müzakirə edilib.

"Respublika" xəbər verir ki, bu barədə Kollegiyanın mətbuat xidməti məlumat yayıb.

Bildirilib ki, iclasda əvvəlcə Vəkillər Kollegiyası Rəyasət Heyətinin üzvü İlhamə Həsənova məruzə edərək Əsasnamənin müddəalarını Rəyasət Heyətinin üzvlərinin diqqətinə çatdırıb.

Müzakirə olunan əsasnamədə Komitənin yaradılma məqsədi, fəaliyyət istiqamətləri, səlahiyyətləri, strukturu və digər məsələlər əksini tapıb.

Əsasnaməyə görə, Komitə 9 üzvdən ibarət olacaq.

Qeyd olunub ki, “Vəkillərin peşə hüquqlarının müdafiəsi komitəsi” peşə fəaliyyətlərini həyat keçirilməsi ilə bağlı vəkillərin hüquqlarının müdafiəsinə dair tədbirlər görəcək, müraciətləri araşdıracaq, təklif və tövsiyyələr hazırlayacaq.

Müzakirəyə çıxarılan Əsasnamə Vəkillər Kollegiyasının Rəyasət Heyəti tərəfindən yekdilliklə qəbul olunub. Rəyasət Heyətinin üzvləri - İlhamə Həsənova ilə Ramiz İbrahimov Komitəyə həmsədr seçilib.

Kollegiyanın sədri Anar Bağırov çıxında “Vəkillərin peşə hüquqlarının müdafiəsi komitəsi”nin yaradılmasını müsbət qiymətləndirib, Komitənin işinin təşkili istiqamətdə zəruri əməli tədbirlərin görüləcəyini vurğulayıb.