6 aprel 2023-cü il tarixində Xarici İşlər Nazirliyinin yaydığı bəyanatda bildirilib ki, İran İslam Respublikasının Azərbaycan Respublikasındakı fövqəladə və səlahiyyətli səfiri Seyyid Abbas Musəvi Azərbaycan Respublikasının Xarici İşlər Nazirliyinə çağırılıb. Görüş zamanı ölkəsinin Azərbaycana münasibətdə nümayiş etdirdiyi son təxribat xarakterli hərəkətlərə görə, İran səfirinə sərt narazılıq ifadə olunub. Səfirin diqqətinə çatdırılıb ki, diplomatik statusla uyğun olmayan və 1961-ci il Vyana Diplomatik Münasibətlər Konvensiyasına zidd fəaliyyətlərinə görə, İran səfirliyinin 4 əməkdaşı Azərbaycan hökuməti tərəfindən "persona non qrata" elan edilib və həmin şəxslərin 48 saat ərzində Azərbaycan ərazisini tərk etmələri tələb olunub.

Məsələyə münasibət bildirən politoloq İlyas Hüseynov deyib ki, hazırkı durumda İranla Azərbaycan arasında olan münasibətlər çox gərgin xarakter daşıyır və bunun əsas günahkarı İran dövlətidir. Azərbaycan İkinci Qarabağ müharibəsində beynəlxalq səviyyədə tanınmış torpaqlarını işğaldan azad etdikdən sonra fars rejimi ölkəmizə qarşı düşmənçilik münasibəti sərgiləməyə başladı. Buna misal olaraq iki ölkə sərhəddinin üzərindən İran qırıcısının uçuşlar həyata keçirməsi, Naxçıvana yaxın ərazidə hərbi təlimlərin baş tutması, eyni zamanda Tehrandakı Azərbaycan səfirliyinə və millət vəkili Fazil Mustafaya qarşı terror aktını qeyd edə bilərik. Eyni zamanda İran-Ermənistan əlaqələrinin yüksək səviyyədə artması, Qafan şəhərində İranın konsulluq açması, eləcə də Təbrizdə İrəvanın konsulluq açmaq istəyi, cənub qonşumuzun bu və ya digər təxribat xarakterli fəaliyyətləri Azərbaycan dövləti tərəfindən təbii olaraq narazılıqla qarşılanır. İranın anti-Azərbaycan siyasətinin əsas faktorlarından biri də ölkəmizin müstəqil xarici siyasət yürütməsidir.

Azərbaycanın İsraildə səfirlik açması xarici siyasətimizin tərkib hissəsidir və heç bir vəchlə üçüncü dövlətə qarşı yönəlməyib. Bu haqda dəfələrlə ölkəmiz tərəfindən bəyanatlar da səsləndirilib. İranın Bakıdakı səfiri Seyyid Abbas Musəvinin xarici işlər nazirliyinə çağırılmasına münasibətimi belə ifadə edirəm ki, dövlətimizin atdığı son addım Azərbaycanda fəaliyyət göstərən səfirlik əməkdaşlarının "persona non qrata" elan olunması və 48 saat ərzində ölkəni tərk etməklə bağlı tələbi düşünürəm ki, haqlı bir yanaşmadır.

Bir müddət öncə, İran səfirliyinə məxsus avtomobillərlə qeyri-qanuni hərəkətlərin edilməsini və bu haqda məlumatların yayılmışdı. Və bu da onu deməyə əsas verir ki, Azərbaycanda olan İran diplomatları pozuculuq fəaliyyəti ilə məşğuldur. Azərbaycanın güclü xüsusi xidmət orqanları bu pozuculuq və destruktiv fəaliyyətin qarşısını alır. Azərbaycanın təhlükəsizliyinə, müstəqilliyinə və suverenliyinə qarşı istənilən məkrli addım atılacaqsa, bunun dərhal ciddi surətdə qarşısı alınacaqdır. Biz Azərbaycanın güclü, Vətən müharibəsində qalib gəlmiş dövlət olduğunu hər bir müstəvidə göstəririk. Bu da öz növbəsində Azərbaycanın milli maraqlarına söykənən yanaşmadır.

Musa BAĞIRLI,

"Respublika".