2020-ci ilin 10 noyabr Bəyanatının 4-cü bəndinin müddəalarını icra etmək əvəzinə, son günlərdə Ermənistan dövlətilə Rusiya sülhməramlı kontingentinin birgə fəaliyyəti Qarabağda yerləşən qeyri-qanuni erməni hərbçilərinə dəstək olaraq canlı qüvvə, silah-sursat, mina, eləcə də digər hərbi təyinatlı vasitələrin daşınması intensivləşib.
Daşımaları xüsusilə gecə vaxtı və dumanlı hava şəraitindən istifadə etməklə həyata keçirsələr də, bütün bu olanlar Azərbaycan Ordusu tərəfindən tam dəqiqliklə müşahidə olunub. Bu haqda məlumat yayan Müdafiə Nazirliyi bildirib ki, qeyri-qanuni erməni silahlı dəstələri tərəfindən bəzi dağlıq və torpaq ərazilərdən keçməklə bir neçə marşrut üzrə yeni yolların çəkilməsi, həmçinin köhnə cığırların genişləndirilməsi üzrə işlər həyata keçirilir. Bu məqsədlə, hərbi, mühəndis və xüsusi texnikadan, habelə işçi qüvvəsi kimi müqaviləli əsasda hərbi xidmətə cəlb olunmuş şəxslər və yerli sakinlərdən istifadə olunur. Xankəndi-Xəlfəli-Turşsu və bu marşrutdan şimalda keçən Xankəndi-Kosalar-Mirzələr-Turşsu yollarında ermənilər tərəfindən qeyri-qanuni tikinti və təkmilləşdirmə işləri aparması Azərbaycan Ordusunun texniki müşahidə vasitələri ilə qeydə alınması nəticəsində məlum olub ki, bu yollardan qeyri-qanuni erməni silahlı dəstələrinin döyüş mövqelərinin təminat və təchizatını həyata keçirmək üçün istifadə olunur. Azərbaycan tərəfinin çoxsaylı müraciətlərinə və bu xüsusda aparılmış müzakirələrə baxmayaraq, silah-sursat və digər hərbi təyinatlı vasitələrin daşınmasının qarşısının alınması üçün Rusiya sülhməramlı kontingenti bu günədək heç bir zəruri tədbir görməmişdir.
Mart ayının 30-da Azərbaycan Ordusu tərəfindən Qarabağda mövcud vəziyyət nəzərə alınaraq Laçın yolunun şimalındakı torpaq yollarından qeyri-qanuni fəaliyyətlər üçün istifadənin, eləcə də Ermənistan tərəfindən silah-sursat daşımaqla vəziyyətin gərginləşməsinin və potensial təxribatların törədilməsinin qarşısının alınması məqsədilə Laçın rayonunun Cağazur və Zabux kəndləri arasında yerləşən bir neçə hakim yüksəklik, əsas və yardımçı yollar, eləcə də sərhədboyu geniş sahələr nəzarətə götürülüb. Qeyd olunan yüksəkliklərin və yolların Azərbaycanın nəzarətinə keçməsi, Silahlı Qüvvələrimiz üçün hansı üstünlükləri qazandırır? Sualımızı cavablandıran hərbi ekspert Ədalət Verdiyev qeyd edir ki, bu yüksəkliklərin Azərbaycan ordusu tərəfindən azad olunması, ilk növbədə, yaxın müddətdə Gorus-Laçın-Xankəndi yolunda nəzarət-buraxılış məntəqəsini yerləşdirməyə imkan verəcək. Davamında isə bu ərazilərdə Azərbaycan Ordusuna düşmənin təxribatlarının qarşısının alınması üçün tədbirlər həyata keçirməyinə şərait yaradacaq. Həmçinin Ermənistan ilə Laçın rayonu arasında sərhədi bərpa etməyə və bu ərazilərdən düşmənin manevrlərini izləmək də mümkün olacaq. Zabux, Sus və Laçın rayonuna qayıdacaq əhalinin təhlükəsizliyi daha üstün səviyyədə təmin olunacaq. Bu ərazilərin düşməndən azad olunması heçbir ölkənin Azərbaycan ilə təhdid dilində danışa bilməyəcəyinin göstəricisidir. Bu, bir daha onu göstərir ki, Azərbaycan Silahlı Qüvvələrinin hissə və bölmələri istədiyi zaman, istədiyi ərazidə günün istənilən vaxtında ən çətin şəraitdə belə, vəzifələrinin öhdəsindən gəlir ki, bu da yüksək peşəkarlığın göstəricisidir. Azad edilən Fərrux, Buzluq, Sarıbaba, 2054 və digər yüksəkliklər Azərbaycanın güc strukturlarının gələcək təmizləmə əməliyyatlarını həyata keçirmək üçün mühüm üstünlükləri təmin edir.
Musa BAĞIRLI,
"Respublika".
