"Novosti": Ermənistan və Azərbaycan ərazi bütövlüklərinin qarşılıqlı tanınması haqqında
razılığa gəliblər
Ermənistanın baş naziri Nikol Paşinyan Ermənistan və Azərbaycan ərazi bütövlüyünün qarşılıqlı tanınması barədə razılığa gəlindiyini bildirib. Bu barədə Serbiyanın xəbər saytı "Novosti.rs" məlumat yayıb.
Paşinyanın sözlərinə görə, ölkələr qarşılıqlı münasibətlərin tənzimlənməsi istiqamətində irəliləyiş əldə ediblər.
Məlumatda qeyd olunub ki, Prezident İlham Əliyev Azərbaycanın Ermənistana qarşı heç bir ərazi iddiasının olmadığını və Ermənistanın Qarabağı Azərbaycanın bir hissəsi kimi tanıdığını nəzərə alaraq, indi ölkələrin sülh razılaşması əldə etmək imkanlarının olduğunu diqqətə çatdırıb.
"The Moskow Times": Ermənistan və Azərbaycan Moskva danışıqlarında normallaşmaya
optimistdir
Ermənistanın baş naziri Nikol Paşinyan və Azərbaycan Prezidenti İlham Əliyev mayın 25-də üç ölkə liderinin birgə danışıqlarından əvvəl Rusiya prezidenti Vladimir Putinlə ayrı-ayrılıqda görüşüb.
Bu barədə Kanadanın "The Moskow Times" saytı məlumat yayıb. Ermənistan və Azərbaycan ərazi bütövlüyünün qarşılıqlı tanınmasından sonra əlaqələri normallaşdırmağa doğru irəliləyir. Bunu iki ölkə lideri Moskvada danışıqlar zamanı bildiriblər: "Ermənistanın Qarabağı rəsmi olaraq Azərbaycanın bir hissəsi kimi tanıdığını nəzərə alsaq, sülh sazişinə gəlmək ehtimalı var. Azərbaycanın Ermənistana heç bir ərazi iddiası yoxdur". İlham Əliyev danışıqlardan əvvəl belə deyib. Paşinyan bildirib ki, iki ölkə ərazi bütövlüyünün qarşılıqlı tanınması əsasında münasibətlərin normallaşdırılmasında irəliləyiş əldə edir. İrəvan regionda Ermənistan ərazisindən keçən bütün nəqliyyat əlaqələrini açmağa hazırdır. Putin isə deyib ki, bütün çətinliklərə və problemlərə baxmayaraq, vəziyyət Qarabağ münaqişəsinin həlli istiqamətində inkişaf edir. Onun sözlərinə görə, üç ölkənin Baş nazirinin müavinləri Azərbaycan və Ermənistan arasında nəqliyyat əlaqələrinin yenidən açılması ilə bağlı qalan məsələləri həll etmək üçün bir həftədən sonra Moskvada görüşəcəklər.
"TRT World": Prezident İlham Əliyev Azərbaycanın Ermənistana qarşı ərazi iddiaları olduğunu inkar etdi
"TRT World" xəbər saytı Prezident İlham Əliyevin Moskvada Ali Avrasiya İqtisadi Şurasının geniş tərkibdə iclasında çıxışı barədə məlumat yayımlayıb. Məlumatda ölkə başçımızın Ermənistanın ittihamlarını inkar etdiyi yer alıb. Prezident İlham Əliyevin "Mən, əlbəttə diskussiya açmaq istəmirəm. Ermənistana qarşı ərazi iddialarımızın olması barədə ittihamlar səsləndiyinə görə demək istəyirəm ki, bizim belə iddialarımız yoxdur", - deyə söylədiyi fikirlər xəbərdə öz əksini tapıb. Dövlətimizin başçısının nitqində istifadə etdiyi "dəhliz" sözü barədə verdiyi açıqlama və bu sözün beynəlxalq termin olduğunu Ermənistanın diqqətinə çatdırması da qeyd olunub.
"CaspianNews.com": Azərbaycan Avropa bazarlarına təbii qaz ixracını artırır
"CaspianNews.com" xəbər saytı Azərbaycanın bu ilin birinci rübündə xarici bazarlara 2,9, o cümlədən Türkiyəyə 2,7 və Gürcüstana 0,9 milyard kubmetr olmaqla, ümumilikdə 6,5 milyard kubmetr qaz tədarük etdiyini bildirib.
2023-cü ilin mart ayında Avropa bazarları Azərbaycandan təxminən 612 milyon kubmetr təbii qaz alıb və hesabat dövründə Azərbaycan 596 milyon avroya yaxın gəlir əldə edib.
Azərbaycan 2020-ci il dekabrın 31-dən Trans-Adriatik Boru Kəməri (TAP) vasitəsilə Avropaya təbii qaz tədarük edir. TAP Cənub Qaz Dəhlizinin (SGC) son seqmentidir və Türk-Yunan boru kəmərindən başlayaraq 773 kilometr quruda və 105 kilometr dənizdə uzanır. Yunanıstanla sərhədi, Yunanıstan və Albaniyanı keçərək İtaliyada son təyinat məntəqəsinə çatır.
Hazırda Azərbaycandan gündəlik qaz ixracının ən böyük hissəsi Avropa bazarının payına düşür və avropalı istehlakçılar gündə təxminən 27 milyon kubmetr Azərbaycan qazı ilə təmin olunur.
2021-ci ildə Avropa Azərbaycandan 8 milyard kubmetr qaz alıbsa, 2022-ci ildə bu rəqəm 11,4 milyard kubmetrə yüksəlib.
