Xalqın arzusu və tələbi
Digər xəbərlər

Xalqın arzusu və tələbi

Partiyamız 7 fevral 2024-cü ildə keçiriləcək növbədənkənar prezident seçkilərində cənab İlham Əliyevin namizədliyini irəli sürüb və bununla bağlı qərar yekdilliklə qəbul edilib. Bu qərar xalqın mövqeyini tam əks etdirir. Çünki xalq Azərbaycanı gələcək nailiyyətlərə və qələbələrə çatdıracaq şəxsin məhz Prezident İlham Əliyevin olduğunu birmənalı şəkildə qəbul edir.

Əlbəttə ki, bunun kökündə ölkə başçısının 20 il ərzində xalqa verdiyi bütün vədləri yerinə yetirməsi dayanır. Prezidentin yürütdüyü müdrik, uzaqgörən, qətiyyətli siyasət nəticəsində Azərbaycan işğala son verərək ərazi bütövlüyünü və suverenliyini bərpa edib. Nəinki müstəqilliyi dövründə, eləcə də son 200 ildə ilk dəfə olaraq Azərbaycan işğal edilmiş torpaqlarını özünə qaytara bilib.

Müstəqil Azərbaycan Prezident İlham Əliyevin rəhbərliyi ilə bir çox uğurlara imza atmış, sosial-iqtisadi inkişaf yolunda mühüm nailiyyətlər əldə etmişdir. Ötən 20 ildə Azərbaycan xalqı həmişə öz liderinə güvənib və inanıb, ona arxa-dayaq olub. Prezidentimizin də böyük fəxrlə qeyd etdiyi kimi, bu uğurların əsasında məhz ölkədəki sağlam ictimai-siyasi mühit, xalq-iqtidar birliyi dayanır. Bu qarşılıqlı inam sayəsində Prezident İlham Əliyevin Azərbaycanı dünyanın ən inkişaf etmiş dövlətlər cərgəsinə çıxaracağı günlər uzaqda deyil.

Prezident İlham Əliyevin dövlətə rəhbərlik etdiyi 20 il müddətində əldə edilən tarixi nailiyyətlər təsdiqləyir ki, ölkə başçımız ulu öndər Heydər Əliyevin xalqa son müraciətində "Mən ona özüm qədər inanıram" sözlərinin ifadə etdiyi böyük etimadı yüksək səviyyədə doğruldub.

Dünyanın siyasi xəritəsində kiçik bir ərazini tutan Azərbaycan artıq geosiyasi məkana çevrilmişdir. Bir çox iqtisadçılar dövlət quruculuğunda və sürətli iqtisadi inkişafda əldə edilmiş uğurları bəzən təbii sərvətlər amili ilə izah etməyə üstünlük verirlər. Ancaq bu bir həqiqətdir ki, zəngin təbii sərvətlərə malik olan ölkələrin heç də hamısı dövlətimizin nail olduğu yüksəlişə, inkişafa müvəffəq ola bilməmişdir. Doğrudur, təbii resursların mövcudluğu mühüm amil kimi müəyyən rol oynayır. Bununla bərabər, sərvətlərin səmərəli istifadə edilməsi, fəaliyyətin forma və metodları da olduqca əhəmiyyətlidir. Eyni zamanda ölkə ərazisinin beynəlxalq kommunikasiya dəhlizlərinin sıx şəbəkəsindəki mobil bir halqaya çevrilməsinin də həlledici rolu danılmazdır. Ticari, sənaye və maliyyə kapitalının informasiya məhsulunun dövriyyə qabiliyyəti bundan çox asılıdır. Bütün bunların fonunda həm də beynəlxalq səviyyədə ciddi aktor qismində çıxış edən subyektə çevrilmək üçün güclü, iradəli, uzaqgörən, yüksək idarəetmə məharəti kimi keyfiyyətlərə malik nüfuzlu lider olmalıdır.

Milli məsələlərdə güzəştə getməyən Prezident İlham Əliyev hakimiyyətə gələndən böyük Zəfər Gününə kimi Qarabağ məsələsində də heç bir güzəştə getmədi, Ermənistana, onun havadarlarına, supergüclərə qarşı qətiyyətlə mübarizə apardı, Azərbaycanın haqq səsini dünyaya çatdırdı. O, 44 gün ərzində siyasi, hərbi lider kimi durmadan, dincəlmədən, sözün əsl mənasında, vuruşdu, həm siyasi arenada, həm də döyüş meydanında zəfər qazanan, Azərbaycan torpaqlarını azad edən, ərazi bütövlüyümüzü bərpa edən böyük sərkərdə kimi tarixə düşdü.

Yeni tarix yazıldı. Bu tarixin gələcək səhifələrini də yazmaq, başladığı missiyanı sonadək yerinə yetirmək üçün xalq öz liderindən, özünün müdrik rəhbərindən bundan sonra da dövlətə rəhbərlik etməsini istəyir. Bəli, bu, xalqın arzusu, həm də tələbidir.

Azərbaycan xalqı öz lideri ilə qürur duyur, Prezident İlham Əliyevin ətrafında sıx birləşərək, onun daxili və xarici siyasətini dəstəkləyir.               

Natiq QULUZADƏ,

YAP Zəngilan rayon

təşkilatının sədri.