2022-ci il sentyabrın 12-də Ermənistan silahlı qüvvələri tərəfindən sərhəddə törədilən genişmiqyaslı təxribatın qarşısının alınması zamanı 5 hərbiçimiz şəhid oldu.  Bu müqəddəslərdən  biri Azərbaycan Ordusunun giziri  Xəyal Əlövsət oğlu Əhədzadədir.  Milyonların ürəyində özünə əbədi yer edən  Vətənin qəhrəman oğlu 1998-ci il avqustun 21-də Lənkəran rayonunun Nərimanabad qəsəbəsində dünyaya göz aşıb. Lənkəran Uşaq-Gənclər İdman Məktəbinin yetirməsi olan Xəyal  boks üzrə məktəblilər arasında 40 kiloqram  çəki dərəcəsində Azərbaycan çempionatının qalibi, eləcə də, yeniyetmələr arasında ölkə çempionatının iştirakçısı olub.

Xəyal İkinci Qarabağ müharibəsində Murovdağ, Cəbrayıl, Füzuli və Şuşa istiqamətində gedən döyüşlərdə savaşıb. Haqq savaşımızda  misilsiz şücaət göstərdiyi üçün  "Azərbaycan Bayrağı" ordeni, Cəbrayılın, Füzulinin, Şuşanın, Kəlbəcərin azadlığına  görə medallarla  təltif edilib. 2022-ci il sentyabrın 12-də Ermənistan Silahlı Qüvvələri tərəfindən törədilən genişmiqyaslı təxribatın qarşısının alınması zamanı  göstərdiyi qəhrəmanlığa görə ölümündən sonra  III dərəcəli "Rəşadət" ordeninə,  “Vətən uğrunda” medalına layiq görülüb.

Bu günlər Lənkəran Olimpiya İdman Kompleksində  şəhid Xəyal Əkbərzadənin  əziz xatirəsinə həsr olunmuş  sərbəst güləş idman növü üzrə uşaq və yeniyetmələr arasında  Lənkəran rayon açıq turniri  keçirilib.  Açılışda əvvəlcə torpaqlarımızın azadlığı uğrunda şəhidlik  zirvəsinə ucalan qəhrəmanların əziz xatirəsi bir dəqiqəlik sükutla anılıb.

Zəfər ORUCOĞLU.